A retirada da sonda vesical debe facerse o máis precozmente posible (categoría IB). En pacientes cirúrxicos con indicación de sondaxe, retirar a sonda tan pronto como sexa posible no postoperatorio, preferiblemente nas primeiras 24 h, de non haber indicación en contra (categoría IB).
Non existe evidencia que indique a necesidade de pinzar a sonda antes da súa retirada (categoría II).
A retirada da sonda a media noite, en vez de como se fai habitualmente durante a mañá, produce unha recuperación máis temperá dos ritmos de micción normais.
Identificarnos e informar a/o paciente do procedemento que se vai realizar, contestando as dúbidas que poida ter sobre este.
Preservar a súa intimidade.
Realizar lavado de mans segundo o protocolo.
Poñer luvas desbotables non estériles.
Colocar a/o paciente na posición adecuada (xinecolóxica na muller e decúbito supino coas pernas separadas no home).
Colocar unha cuña ou empapador debaixo da/o paciente.
Tras desinfectar a conexión, conectar unha xiringa de 10 cc no lugar axeitado da sonda e extraer todo o contido do balón de ancoraxe. Se non é posible extraer todo o contido do globo, deixar a xiringa conectada e esperar 10-15 minutos, sen aspirar, a que drene por ela mesma.
Unha vez desinflado o balón, retirar a sonda lentamente cara a fóra.
Limpar os xenitais de posibles restos.